Job 18:5-21

5 ^a“Taa ya mwovu imezimwa,
nao mwali wa moto wake umezimika.
6 ^bMwanga hemani mwake umekuwa giza;
taa iliyo karibu naye imezimika.
7 ^cNguvu za hatua zake zimedhoofishwa;
shauri lake baya litamwangusha.
8 ^dMiguu yake imemsukumia kwenye wavu,
naye anatangatanga kwenye matundu ya wavu.
9 ^eTanzi litamkamata kwenye kisigino;
mtego utamshikilia kwa nguvu.
10 ^fKitanzi kimefichwa ardhini kwa ajili yake;
mtego uko kwenye njia yake.
11 ^gVitisho vimemtia hofu kila upande,
na adui zake humwandama kila hatua.
12 ^hJanga linamwonea shauku;
maafa yako tayari kwa ajili yake aangukapo.
13 ⁱNayo yatakula sehemu ya ngozi yake;
mzaliwa wa kwanza wa mauti atakula maungo yake.
14 ^jAtangʼolewa kutoka usalama wa hema lake,
na kupelekwa kwa mfalme wa vitisho.
15 ^kMoto utakaa katika hema lake;
moto wa kiberiti utamwagwa juu ya makao yake.
16 ^lMizizi yake chini itakauka
na matawi yake juu yatanyauka.
17 ^mKumbukumbu lake litatoweka katika dunia,
wala hatakuwa na jina katika nchi.
18 ⁿAmeondolewa nuruni na kusukumiwa gizani,
naye amefukuzwa mbali atoke duniani.
19 ^oHana mtoto wala mzao miongoni mwa watu wake,
wala aliyenusurika mahali alipoishi.
20 ^pWatu wa magharibi watashangaa yaliyompata;
watu wa mashariki watapatwa na hofu.
21 ^qHakika ndivyo yalivyo makao ya mtu mwovu;
ndivyo palivyo mahali pake mtu asiyemjua Mungu.”